काठमाडौं । इजाजतप्राप्त धितोपत्र दलाल कम्पनी साउथ एसियन बुल्स प्रा.लि.ले काठमाडौं र ललितपुरका दुई शैक्षिक संस्थामा लगानीकर्ता सचेतना कार्यक्रम सम्पन्न गरेको छ ।
कम्पनीले काठमाडौंस्थित अपोलो इन्टरनेशनल कलेजमा २०८३ असार २९ गते र ललितपुरस्थित पिनाकल एकेडेमीमा २०८३ असार ३१ गते कार्यक्रम आयोजना गरेको हो । कार्यक्रमको सहजीकरण बेटा एनालिटिक्स प्रा.लि.ले गरेको थियो ।
अपोलो इन्टरनेशनल कलेजमा बीबीए, बीबीएम तथा बीबीएस कार्यक्रमका ७० भन्दा बढी विद्यार्थी सहभागी थिए भने पिनाकल एकेडेमीमा ८० भन्दा बढी विद्यार्थीले सहभागिता जनाएका थिए ।
अपोलो इन्टरनेशनल कलेजमा आयोजित कार्यक्रममा स्रोतव्यक्ति सञ्जीव घिमिरे तथा पिनाकल एकेडेमीमा विक्रम चित्रकारले प्रशिक्षण दिएका थिए । उनीहरूले वित्तीय साक्षरता, लगानी योजना, जोखिम तथा प्रतिफलको मूल्याङ्कन, पूँजी बजारमा सूचित निर्णयको महत्व, दीर्घकालीन सम्पत्ति सिर्जनामा शेयर बजारको भूमिका तथा लगानी गर्दा ध्यान दिनुपर्ने विषयबारे जानकारी दिएका थिए ।
कार्यक्रममा साउथ एसियन बुल्सका प्रतिनिधिहरू, अपरेसन हेड तथा कम्प्लायन्स अफिसरसहित, सहभागी थिए । उनीहरूले कम्पनीका सेवा, स्टक ब्रोकरको कार्यप्रणाली, लगानीकर्ता सहायता प्रणाली तथा नेपालको पूँजी बजारमा ब्रोकर कम्पनीहरूको भूमिकाबारे जानकारी दिएका थिए ।
पिनाकल एकेडेमीका अध्यक्ष सरोज न्यौपाने तथा अपोलो इन्टरनेशनल कलेजका कार्यकारी निर्देशकले यस्ता कार्यक्रमले विद्यार्थीहरूमा वित्तीय तथा लगानीसम्बन्धी चेतना अभिवृद्धिमा महत्वपूर्ण योगदान पुर्याउने विश्वास व्यक्त गर्दै कार्यक्रमप्रति खुशी व्यक्त गरेका थिए । सो अवसरमा स्रोतव्यक्ति तथा साउथ एसियन बुल्सका प्रतिनिधिहरूलाई सम्मानस्वरूप मायाको चिनोसमेत प्रदान गरिएको थियो ।
कार्यक्रममा विद्यार्थीहरूको उत्साहजनक सहभागिता रहेको थियो । अन्त्यमा अन्तरक्रियात्मक प्रश्नोत्तर सत्रसमेत सञ्चालन गरिएको थियो ।
साउथ एसियन बुल्स प्रा.लि.ले कार्यक्रम सफल बनाउन सहयोग गर्ने अपोलो इन्टरनेशनल कलेज र पिनाकल एकेडेमीप्रति आभार व्यक्त गर्दै नेपालभरका युवा तथा सम्भावित लगानीकर्तामाझ लगानीकर्ता शिक्षा र वित्तीय साक्षरता प्रवर्द्धन गर्ने आफ्नो प्रतिबद्धता दोहोर्याएको छ ।