ललितपुर, साउन १४ गते
अनलाइन बाल सुरक्षालाई प्रभावकारी बनाउन युवाको क्षमता अभिवृद्धि गर्ने उद्देश्यले भ्वाइस अफ चिल्ड्रेनले तीनदिने प्रशिक्षक–प्रशिक्षण (टीओटी) तालिम सञ्चालन गरेको छ ।
साउन १३ देखि १५ गतेसम्म ललितपुरस्थित सोसल वर्क इन्स्टिच्युटमा सञ्चालित ‘अनलाइन बाल संरक्षणका लागि युवाको भूमिका सम्बन्धी प्रशिक्षक–प्रशिक्षण’ मा कोशी, बागमती र गण्डकी प्रदेशका २५ जना स्वयंसेवक सहभागी छन् । संस्थाको ‘साइबर सुरक्षा परियोजना’ अन्तर्गत आयोजित तालिमले युवामा डिजिटल साक्षरता, कृत्रिम बौद्धिकता (एआई), नेतृत्व विकास, प्रभावकारी सञ्चार तथा अनलाइन बाल सुरक्षासम्बन्धी ज्ञान र सीप अभिवृद्धि गर्ने लक्ष्य राखेको छ ।
तालिमको दोस्रो दिन एआई विज्ञ अजय शर्माले ‘डिजिटल साक्षरता र कृत्रिम बौद्धिकता’ विषयमा सहजीकरण गर्नुभयो । उहाँले डिजिटल साक्षरताको आधारभूत अवधारणा, डिजिटल सुरक्षा, जिम्मेवार एआईको प्रयोग तथा युवाका लागि एआईको उपयोगिताबारे प्रस्तुति दिँदै सुरक्षित र नैतिक डिजिटल अभ्यासले बालबालिकालाई अनलाइन जोखिमबाट जोगाउन महत्वपूर्ण भूमिका खेल्ने बताउनुभयो ।
तालिममा सहभागीहरूले साइबर जोखिम, व्यक्तिगत सूचना सुरक्षा, तथ्य परीक्षण, जिम्मेवार एआई प्रयोग तथा समुदायमा डिजिटल सचेतना विस्तारका उपायबारे अन्तरक्रियात्मक छलफल गरेका थिए ।
संस्थाका अनुसार तालिमपछि सहभागीहरूले आफ्ना समुदायमा डिजिटल साक्षरता र अनलाइन बाल सुरक्षासम्बन्धी प्रशिक्षण सञ्चालन गर्ने, सम्बन्धित नीति तथा कानुनको समीक्षा गरी सुधारका लागि सिफारिस तयार गर्ने तथा सरोकारवाला निकायमा ध्यानाकर्षण गराउने अपेक्षा गरिएको छ । वि.सं. २०५७ मा स्थापना भएको भ्वाइस अफ चिल्ड्रेनले जोखिममा परेका बालबालिकाको संरक्षण, पुनस्र्थापना तथा बालअधिकार प्रवद्र्धनका क्षेत्रमा निरन्तर काम गर्दै आएको छ ।
